ماهو الفرق بين الرجل والذكر ..؟ الجواب في الداخل ... ارحبووووو

السلام عليكم ورحمة الله وبركاته
،،،،،،،،،،،،،،،،،،،،،،،، حذف بواسطة جميل
مالكم بالطويله

طبعا الكل شايف الفرق بين رجال اول ورجال الحين

انا ماقول ان مافيه رجال لا حشى فيه ونص ولكن الغالب رخوم والرجال يكادون يعدون على الاصابع

من يوم تركو عادتهم الاوله وسلم ابيهم وجدهم وهم اردى فاردى

الرجال اول بفعايلهم برجولتهم بشهامتهم بحمياهم على القبيله والاهل والجار والبعيد

والشجاعه والفزعه وسلومهم الطيبه

ابسط مثال (( القهوه )) من سلمهم تحمس قدام الضيف وتدق وتفوح

(( القهوه )) لو ماشربها الضيف يلبى طللبه لو هو ويش << والحين لو ماشربها فالعنة تلعنه خخخخ

المجلس الي مافيه قهوه مجلس (( هـــمـــــي )) ضايع اصل وعيب وطر جيب

والحين للاسف

الحين نصنا تجيه قهوته من مطبخه ومسويتها فلبينه ولا اندونيسيه << ويش عرفها بالكيف ياناه

اذكر شخص قالي مره (( قهوتكم هذي اللي ازعجتونا فيها ابشرك مابعد ذقتها )) << اكيد عرفتوه

المشكله انه من قبيله معروفه (( ههههههههههه )) << يمكن شاب ضوه مهم الله واعلم

يحسبنه بالكلمه ذي انه مايعرف قهوتنا بيتطور وبيزيدون معجباته خخخ << الوكاد ان الرجوله علوى وهو حدرى

مادرى انه عقب كلمته ذي غدى عندي (( جناع باعوضه مطير في العجه ))

(( الصبي وان طاب طيبه من خواله .... وان تردى فعرف انهم خايبيني )) << يمكن العرق دساس .. اذكر انه مره قال خواله مدري منين

الحين الرجال اللي تصير مشكله لولد عمه ولا قريبه وكنه غريب مايقرب منه ولا يحاول يستفسر

(( كلن نفسي نفسي )) لعنبو غيرك وين الحميا ,.؟ وش خليت للنسوان ..؟؟ ماناقص الا تلبس برقعك وتربض مع اماتك

طيب خلونا من الموضوع هذا

نجي للي يحط راسه براس بنت من خلال الشبكه العنكبوتيه او في الواقع

وناقد من الدرجه الاولى ويتكلم في امور ويتفلسف (( في صالته ومجلسه مافيه الا الذبان )) << رجال ذا

ولا علومه كلبيها فلوسي وفلوسي (( ويصور ربطات فلوس ويحطها على طبلون موتره )) تحسبنها بترزك ولا بتطلع رجولتك اللي لو تحج البقر على قرونها ماطلعت خخخخ

<< ماتقصد حد خخخخخخخخخخ


في ذمتكم الفصيله هذي من اشباه الرجال (( مهوب حرام نطلق عليهم اسم رجل )) << قسم بالله اني ارجل منهم وانا بنت

انا مناب مسترجله بس انوثتهم غطت على انوثتي

يقول شاعري ابن جدلان

((عباد مغفلها الزمان واتعجبي
يحسبون قل المال في الرجل عذروبه)) << جعلهم فدا ثرك ذا الخمه الوباء

الرجوله عسسسسسسسسسسسسرهـ مهوب كل من هب ودب وقال انا رجال صدقناه

بعضهم مايفرق بينه وبين اخته الا الشنب

ولاتطلع في خده حبه صك على روحه الباب اسبوع في غرفته مكتئب

وفوق ذا يقول رجال (( الله يرحمك يابو عدي )) << لاتقولون وش جاب طاريه

هو في بالي على طول كل ماشفت احوال رجال الامه طرى علي وصدق من يوم مات والعرب مااااش


فيه قصه قدييييييييييمه للشاعر الغيهبان المري رحمه الله

اتركم مع القصه..

هذه قصيده قالها عندما كان راحل هو وابله ومرته من ديارهم

يدور للحيا وعند ما اقتربوا من عد ((بير)) توجد بين تمره والسليل حاليا

تسمى الطوا ترك ابله ومرته لكي يذهب الى العد ليرى هل فيها ماء ويعود

وعندما عاد الى المحل وجد امرته عاريه وتبكي والبل ماخوذه فاخذ عمامته

وسترها بها وقام ولحق البل على جرتها ولحق القوم وتعارك هو واياهم

ذبح منهم خمسة عشر رجال وفك البل وعاد بها (( بروحه ومامعه فزعه ))

بعض الابيات من القصيده ..


يوم جيت لاذي كاعبي مسلوبـه.........تذرف بدمعة عينهـا النجلائـي
بيضا مخالطة البياض بصفـره.........مثل الذهب في الفضة البيضائي
ثم قلت يالكاعب عليش بسترش.......الستر تحت عمامـة نصبائـي
كاني لحقت البـل ولا رديتهـا.........فانـا رقيـد القينـة السودائـي
كاني لحقت البـل ثـم رديتهـا..........فانا رقيد الكاعـب البيضائـي

اشهدن لها رجال

لو انه واحد الحين كان ضربته العقاقيل في محله وطاح منجفع والذبان يومي فوق راسه

كان قال اخذو مرتي لابوها لابو من جابها بس خلوني

ولا الحوارات اللي تدور بين الاعضاء في المنتدى

الرجال يبرى للبنت الين يشبكها وهي افرح مالها ان جاها صديق

<< مصدقه انها يحبها وهو في قرارة نفسه يقول الحمدلله انها ماتقرب لي

يالخبل (( اسئليه يرضى ان اخته تعرف على واحد )) اتحداش يقول ايه

والى قال ايه اتراه (( ........... )) يعقبه الفنجال

(( مايدري ان كل دقه بدقه ))

اختك ولا مرتك ولا بنتك ولا بنت عمك .....

من غلط في بنات الناس غلطو في بناته

ومن زنا في بيت ناس زنو في بيته ...

اتقهو الله يابشر في نفسكم وفي شوفاتكم

خلك رجال بكل ماتعنيه الرجوله من كلمه

اترك الاسلوب الخبيث الاسلوب النجس اسلوب الرخوم اسلوب الغدر المكر

خلك صوره مثاليه للرجل

صوره نقيه طاهره << والمعروف عن الرجل الطهور والنظافه بعكس المرأه

<< كيفي كم مره اقول ماحب النسوان مادانيهم

واتركم مع قصيدة ابن جدلان اللي اموووووووووووووت فيها

الايالهبوب الباردة عجلي هبي
على جاش من قامت هواجيسه تلوبه
انا مرة اصحى ومرن يغيبي
اسرح مع كثر الطواري بغيبوبه
الا يادهر ماهوب حق تلاعبي
وخليتني لمقرد الخلق لعبوبه
عباد مغفلها الزمان واتعجبي
يحسبون قل المال في الرجل عذروبه
وانا قانع بلي علي كاتب ربي
ومومن بمقدورة وقانع بمكتوبه
ولا ابغى عمى الاريا برايه يجربي
وهو ماعرف ماجوب ربي وما جوبه
هذور المجالس راعي المدح والسبي
وهو في الخلا لوجاه بنت خذة ثوبه << يالبى ذا البيت انا اششششششهد
يقولون لي جز من تصرفك والتحبي
وانا توبتي من مجتمعهم هي التوبه
ديار الوبا من طبها راح متوبي
وقرابة الجربا على الحول مجروبه
وانا عارف منصاي لمن بدا نبي
واعرف طريقي الي بتجه صوبه
وانا اعرف من اعادي وانا اعرف من احبي
وبه ناس لاتبغض ولاهي بمحبوبه


واحتري نقاشكم وريلاكسسسسسس ياحلوين


هذا رابط موضوعي عن البنات المايعين للي ماقروه

7

7

البنات المايعات اللي يحاولون يلفتون الانتباه بالدلع والتبقط ..؟؟ ارحبوو ابغيكم شوي ..


الموضوع مكتوب مخربط لاني انعس وباروح ارقد << جعله مرقد العافيه

والرجاء من الاداره ماتحذفه مثل ماصار مع موضوعي الاولي

لاني قاصده الموضوع بالحرف والمنتدى الغرض منه توعية الجميع
،،،،،،،،، حذف بواسط جميل
أبي اشوف وجهات نظركم واشوف تفكير العالم هل هو مثل تفكيري

هل انتو مؤيدين لهم ..؟؟

ارجع اكرر الموضوع للنقاش فقط لاغير << نذرن على خيط ارقبتي اني انااااقش لاحد يجي ويدبل كبدي

واسمحو لي لاني ماعرف اتكلم بالفصحى وكلام مرتب .. بس المهم ان المعلومه وصلت

احتريكم وجعل اللي مهوب راد الجدري وحمى الصفري

( اختك ياصبي )


صح لسانك على الطرح القيم والهادف جداً....


وانا معكِ في كل ماذكرتيه....


والآن للأسف لم يعد هناك إلاّ قليييييل ممن يطلق عليهم لقب رجل....( والرجال قليل )....


وخاصةً في عالم النت....


وللأسف كذلك بعض من هم هنا مرضى....عسى ان يهدينا الله واياهم ولا يبتلينا....


ونسوا انه ( كما تدين تدان )....و ( دقة بدقة ولو زدت لزاد السقا )!!!!....


والله اني متعجبة من حال الجنسين معاً!!!!....


محاولات تشبيك!!!!....وللأسف بعضها ينجح والعياذ بالله!!!!....

تم ترصيع الموضوع بنجمات احليوات


يستاهل




لي عوده للموضوع <<<< بهالنوم

السلام عليكم ورحمة الله وبركاته

أؤيد بأن معنى الرجولة قلت / وخير مثال ودليل الحياة الزوجية
فمن لا يحمل المسؤولية ويضعها على كتف زوجته فهو ليس برجل
ومن يضرب زوجته ويكون عنيفاً معها ليس برجل
ومن لا يلبي مطالبها الشخصية ويلبي مطالبه فهو أناني وأيضاً ليس برجل
ومن لا يغار على زوجته ويحرص عليها ويصونها فهو ليس برجل
ومن ينهب راتب زوجته ويستنزفها مادياً فهو ليس برجل
وأخيراً / من يقسم بالله بأنه يعشق زوجته ثم يضربها ويهينها ويلعنها
ثم يعتذر لها وهكذا يتقلب فهذا مريض نفسياً ويحتاج لعيادة نفسية لمعرفة الخلل
أما بما يخص الواقع والمعاكسات غير الحياة الزوجية
فهي نزوات وأخطاء إما أن تزول أو تستمر من سيء لأسوأ

/

( اللهم من اراد بنا سوءاً فاجعل تدبيره في بتدميره )....

يالغلا ليل الدعوة لهم بالصلاح والهداية أفضل من هذه
فربما تنقلب على صاحبها يا غالية : )

وإن حدث ظلم أو افتراء فالملجأ إلى الله سبحانه وتعالى
ولن يرد دعوة عبدهـ المظلوم ..

ورجاااء خاص ومطلب للجميع ولا أقصد أي شخصية على الإطلاق
النقاش حرية شخصية للغير ولكن الدعوة على فتاة أو شاب ليس حرية نملكها
وليس محاولة إصلاح أو تغيير بل يعكس تماماً كل شيء وهو هدم وليس بناء
فالدعاء لهم بالهداية واجبنا أو السكوت /
بينما الدعاء على أي انسان في حالة ظلم أو قذف شخصي
فهنا الدعاء بالحسبنة وتفويض الأمر إلى الله ويكون الدعاء سراً ..

/

والله يهدي ويصلح جميع البنات والشباب يارب العالمين
الغافلين والغافلات / المنحرفين والمنحرفات / المسترجلات والغير رجال
والله يستر على الجميع دنيا وآخرة ياااارب

شكراً أختي أختك يا صبي على طرحك الجريء والواقعي جداً

احترامي وتقديري

( دفا المشاعر )

8

صدقيني يا ليــل الغالية

أنا أعلم بأنكِ تتحدثين عما يقع وهذا أمر مؤلم وفتاك جداً

لكن

محاولة التشبيك تكون في كل مكان وخطوة /

سواقين أجانب / رجال سعوديين / بائعي المحلات بمظهر خيال لاجل يغروا البنت ويا كثرهم كثراة
رجال أعمال / مسؤولين / منتديات / وأيضاً أقسام بداخل المنتديات يتركز بها الغزل الملحوظ / مستشفيات
شركات / رجال متزوجين / رجال غير متزوجين / العصابة المتؤامرة لفضح البنات بالصور وهذه انتشرت
عمال النظافة / مواقع التزويج الفاشلة وقليل جداً جداً يكون بها اتفاق مع شيوخ ثقة ويتم تزويج الطرفين

لذا بعد معرفة أمثلة وغيض من فيض لهذه الفئات والأماكن لنعلم يقيناً بأن التشبيك ليس نطاق محصور بل هو بكل مكان ومن كل فئة وطبقة ، ومن تعرضت تستخدم أسلوب التطنيش وكأنه والجدار واحد ، ومن تعرضت لأذية بكثرة اتصلات أو سرقة ايميل تجعل أحد أقاربها يتدخل فوراً لإيقافه ووضعه عند حدهـ وهذا هو التصرف الطبيعي لمثل هذه المواقف ..

لأن المعاكس دائماً يخاف من أهل الفتاة ويخاف جداً من مواجهة محرم الفتاة فيسحب ثوبه الجبان بجري صاروخ فراراً من الكارثة إللي جاته ..

ثم الدعاء على سجادة بينها وبين نفسها وأمامها ربها اللهم احفظني من الفتن والفساد وسوء الأعمال والضلال و ... الخ وهكذا لن والله العظيم تمس الفتاة شعرة واحدة من أي رجل واطي ..

الشي الأخير

الواثق من نفسه يمشي ملكاً ولا يهاب أي رياح تأتيه مادام هو لم يخطئ بشيء ..
وأفضل وأعظم دعوة في حال ظلم شخص أو الافتراء هو حسبنا الله ونعم الوكيل مراراً وتكراراً
والدعاء واجب ليس للنفس فقط بل لجميع الشباب والفتيات بالهدااااية والصلاح



/

(( يارب ان كانك بتهديهم ولا اخذ ارواحهم ))

أسألك بالله يا أختك يا صبي :

هالدعوة تكررينها وترددينها عشر مرات مع نفسك

شوفي وش بتحسي وتشعري بعدها ؟؟

وبعدين يا الله أسألك إنك تهديهم وإن ما هديتهم خذ أرواحهم وفكنا منهم

يعني إن ما أنهدوا وربي هداهم يعني الله ياخذهم يعني الله يدفنهم بقبورهم يعني الله يموتهم ويحرم أهاليهم منهم

معليش هذي الترجمة الصحيحة لهالدعوة

إنتِ كذا دعيتِ عليهم وإنت كذا بهالدعوة يمكن تنقلب عليكِ ويمكن أيضاً تستجاب والسماء مفتوحة وتسببي حزن وألم وقهر لأهاليهم ويا يجيله مرض ما يشفى منه طول العمر أو فعلاً يموت وإذا مات عاد شوفي تأنيب الضمير إللي ماراح يرحمك ولا ثانية

أفضل وأعظم دعوة في حال ظلم شخص أو الافتراء هو حسبنا الله ونعم الوكيل
اللهم إني فوضت أمري إليك وهو دعاء معروف وأطول من هذا ولا أذكرهـ ..

/

طبعاً المعاكسات مشكلة لا علاج ولا دواء لهم فهي داء منتشر بكل مكان والسبب شهوات وغرائز وحب النساء وكذلك أيضاً الفتيات اللاتي يعاكسن الشباب اللهم حدث ولا حرج / من معاكسات البنات للرجال من أهلي والله تقشعر منها الأبدان / ومعاكسات الشباب للفتيات حينا أرى أقول شر البلية ما يضحك فهو شيء مخجل بحق

/

وبخصوص انعدام الرجولة حتى بالضيافة / صاروا البعض يضيفوا بالعصير بدل القهوة ههههههه تعرفون هذي الموضة وما فيها الزوجة تسوي القهوة تتكاسل بس تحط بن وموية خخخخخخ طبعاً هذا للبعض لكن في منهم يقوموا بالواجب على أكمل وجه ما شاء الله

/

بصراحة نقاشك يتحدث عن عادات القبائل في الفزعات والضيافة وهيك شغلات أما احنا حضر فينا البساطة والعطاء والكرم والجود ونشيل الناس كلهم فوق روسنا حتى الأعداء نبتسم لهم ولا نعطيهم اعتبار ونختلف عن عاداتكم في الفزعات وأشياء ثانية

وبخصوص أبيات الشعر والله شايفتها صعبة وأغلبها مفردات بدوية صعيبة علي
يبيلي ترجمة كاملة لها وفهمت بالمجمل و صح لسان الجدلان وغيرهـ

( أتمنى يا أخواتي ليل و أختك يا صبي ما تتضايقون لنقاشي لأني أرد الصراحة بالصراحة وهو مجرد نقاش ومو أكثر ولتصحيح بعض الأخطاء الواردة التي يقع بها الإنسان بلحظة تسرع )

وسوري على عدم ترتيب الرد لضيق وقتي

بس إنه أكيد مفهووووم

واختلاف الرأي لا يفسد للود قضية : )

[ اليوم الموعد مع برنامج الخط الأحمر بقناة LBC لا تنسوا تتابعوا البرنامج كل أربعاء ]

وربما لي عودة بالموضوع لإستكمال النقاش

احترامي وتقديري

وعليكم السلام ورحمة الله وبركاته

يا بنت في أحد يختم موضوعه بدعاوي ولا دعاوي غريبه عجيبه

عموماَ موضوعكـ متشعب ويفتح افاق واسعة للحوار

كما يقال ( المجالس مدارس)

العيال يتعلمون سلوم الرجال من مجالسة أباءهم وأجدادهم وكبار السن وتجده في سن صغير يتحمل المسؤليه ويفتح بيت ليثبت للجميع أنه رجل قادر على تحمل المسؤليه ولكن في وقتنا هذا تجد المراهق أكبر همه انه يدخن ليثبت أنه رجل !!! وكم ضيعت كلمة ( خلكـ رجال وجرب ) شباب ومازالت !!!بسبب الصحبة الفاسدة
أما بالنسبه لتلكـ الظواهر التي ذكرتيها أضيفي اليهم من يسمح لزوجته أو أخته بارتداء العباءة المخصرة واللثام ويتجول معهن في المولات واللذي نفسي بيده انه ما فرق عنهن مافيه مرجله ولا غيره على محارمه
وايضاًمن تخلى عن دوره الرئيسي تجاه أسرته وأطفاله وتبادل الادوار مع زوجته فأصبحت هي من تعمل بينما
هو لايسطع نجمه ويظهر الا اخر الشهر!!!
حقيقة ظواهر يندى لها الجبين حقاً واعتقد أن الدور الرئيسي على تربية الوالدين و كيفية احتوائهم لاولادهم من تلكـ الفتن
ومــع ذلكـ أقولكـ الدنيا بعدها بخـير
أختكـ ياصبي
تمتلكين اسلوب مرح في طرح القضايا ومناقشتها بس بطلي دعاااوي هههههه
دمتِ بخير

،،

الفاضله : اختك يا صبي

لله درك يا النشميه ع أختيار الموضوع و الأسلوب في الطرح

و شاكر لك و ع الله ينفع مع أشباه الرجال

،

تسجيل مرور ولي عوده تليق با الموضوع

،

وفقك الله ورعاك

،،

الحال في الطرفين
ولكن بقاء جزء من الماضي نعمه للطرفين

وبالنسبه لي الحمد لله للحين اعلومي غانمه وقهوتي بـ مشبي :)

وبنسبة للرخوم و الرخمات واجد وفيه من أول ولكن النسبه زاده حبتين الايام

,


شوفي انا قلتها لكـ قبل واقولها لكـ الان ..

صـــــــــــــــح عليكـ وعليتس وعلاكـ وعليش !!

وانضم الى القافلة التي تحملكـ انتي وليل للدعاوي على مثل هؤلاء الشرذمة من الرجال ..

والدعاء حرية شخصية ولن يعود علي بيوم طالما انا مظلومة ابدا ابدا ابدا ..

واللي مو مسوي شيء غلط ماراح يخاف من اي دعوة تجيه !!

صح ولا لا ؟؟؟

ومافيه مجال للنقاش عندي في هالنقطة بنوب بنوب ..

عموما كفيتي ووفيتي وماخليتي مجال للرد غير الموافقة على رايكـ الصحيح و اتفاقي مع دفا في صعوبة ابياتكـ الشعرية ..


الله يعطيكـ العافية ياربـ ..

سلمتي وسلم قلبكـ ..


تشكرات غلاتي ,,


,

صباح الورد والياسمين

دعاوي على البنات والشباب مافي وممنووووع
أما نقاش بأي أسلوب هذي حرية شخصية

معليش مو بهالدرجة الواحد ياخذ راحته بالدعاء على الغير << أنا واقفة عند باب النقاش ومتفرغة

والدعاء ماله شغل بالصح والغلط لأننا مسلمين وواجبنا التناصح والتوعية
والسعي لتعديل سلوكيات المنحرفين والمنحرفات مش الدعاء عليهم

والدعاء يمثل تفريغ من قهر وألم مكبوت لذا بهذه الحالة وبحالة الظلم أو التجاوز على فتاة من شاب
فلتحسبن عليه بالسر وليس بالعلن << أوكــي << أحلى يا أوكي

وأنا قاعدة بالمرصاد لأي دعوة تزحلق : )

/

الدرة رحيل العمر

يا ذي صح عليــك خليتِ كل غرابيل تتداولها ههههه

بعدين بأتفاهم معك يا وردتي ^ـــــ*

/